Breaking

Thursday, July 9, 2020

July 09, 2020

யாழ் வைத்தியசாலை வீதியில் நடந்த கத்திக்குத்து தாக்குதலில் ஒருவர் படுகாயம்! 

யாழ் வைத்தியசாலை வீதியில் நடந்த கத்திக்குத்து தாக்குதல்!


யாழ்ப்பாணம் வைத்தியசாலை வீதியில் இன்று(வியாழக்கிழமை) பிற்பகல் ஒருவர் மீது கத்திக்குத்து தாக்குதல் நடந்துள்ளது. இதன் போது படுகாயமடைந்த நபர் யாழ்ப்பாணம் போதனா வைத்தியசாலையில் அனுமதிக்கப்பட்டுள்ளார் என தெரிவிக்கப்படுகின்றது. 

மேலும் இந்த கத்திக்குத்து தாக்குதல் யாழ்ப்பாணம் வைத்தியசாலை வீதியில் உள்ள மோட்டார் சைக்கிள் விற்பனை நிலையம் ஒன்றில் பணியாற்றும் ஊழியர் மீதே மேற்கொள்ளப்பட்டுள்ளது. 

அத்துடன் இந்த தாக்குதல் சம்பவம் தொடர்பாக யாழ்ப்பாணம் பொலிஸார் விசாரணைகளை மேற்கொண்டுள்ளனர்.
July 09, 2020

யாழில் வாள்வெட்டு கும்பலின் வீட்டொன்றில் இருந்து கைக்குண்டு,இராணுவச்சீருடை, வாள்கள் மீட்பு!

யாழில் வாள்வெட்டு கும்பலின் வீட்டில் இருந்து கைக்குண்டு,இராணுவச்சீருடை, வாள்கள் மீட்பு!


யாழ்ப்பாணத்தில் நேற்றைய தினம் மாவட்ட செயலக தேர்தல் தெரிவத்தாட்சி அலுவலகத்தில் பணியாற்றும் உத்தியோகத்தர் மீது வாள்வெட்டு தாக்குதல் மேற்கொண்ட குற்றச்சாட்டில் கைது செய்யப்பட்ட 5 சந்தேக நபர்கள் தங்கியிருந்து  வீடு பொலிஸாரால் சோதனைக்குட்படுத்தப்பட்டது.

யாழ் நீர்வேலி கரந்தன் பகுதியில் உள்ள குறித்த வீட்டின் வாழைத் தோட்டத்தில் இருந்து கைக்குண்டு ஒன்று, வாள்கள் மூன்று, மோட்டார் சைக்கிள்கள் இரண்டு, இராணுவச் சீருடைகள், தேசிய அடையாள அட்டைகள் உள்ளிட்டவை பொலிஸாரால் கைப்பற்றப்பட்டுள்ளதாக தெரிவித்துள்ளனர். 

வாள்வெட்டு சம்பவத்துடன் தொடர்புடைய யாழ்ப்பாணம் தலைமையகப் பொலிஸ் நிலைய பெரும் குற்றத் தடுப்புப் பொலிஸ் பிரிவினரினால் மேற்கொள்ளப்பட்ட அதிரடி நடவடிக்கையில் சந்தேக நபர்கள் நேற்றிரவு(புதன்கிழமை) கைது செய்யப்பட்டனர். அவர்களில் பிரதான சந்தேக நபரான மருதனார்மடம் ஜெகன் அல்லது கைலாயம் வழங்கிய வாக்குமூலத்தின் அடிப்படையில் குற்றச்செயலுக்கு தயாராகும் வீடு பொலிஸாரால் முற்றுகையிடப்பட்டது. 

யாழ்ப்பாணம் மாவட்ட செயலகத்தில் கடமையாற்றும் மல்லாகத்தை சேர்ந்த பொன்னம்பலம் பிரகாஸ் எனும் சுற்றுச்சூழல் அதிகார சபை உத்தியோகத்தர் மீதே நேற்றுக் காலை குறித்த தரப்பினரால் வாள்வெட்டு  தாக்குதல் நடத்தப்பட்டது. 

குறித்த உத்தியோகஸ்தர் நேற்றைய தினம் காலை கடமைக்காக வந்த போது, அவரை பின் தொடர்ந்து மோட்டார் சைக்கிள் வந்த நால்வர் மாவட்ட செயலக வாயிலுக்கு அருகில் வழி மறித்து அவர் மீது தாக்குதலை நடத்தியுள்ளனர். 

தாக்குதலில் கையில் வாள் வெட்டு காயத்திற்கு இலக்கான உத்தியோகத்தர் பாதுகாப்பு தேடி மாவட்ட செயலகத்தினுள் ஓடியுள்ளார். அதன் போதும், இருவர் அவரை பின் தொடர்ந்து மாவட்ட செயலக வளாகத்தினுள் புகுந்தும் தாக்குதலை மேற்கொண்டதுடன், வெளியில் வந்து, வேறொருவரின் மோட்டார் சைக்கிள் மீதும் தாக்குல் மேற்கொண்டு அதனை சேதமாக்கி விட்டு தப்பி சென்றனர். 

தாக்குதலுக்கு இலக்கான உத்தியோகத்தர் யாழ்ப்பாணம் போதனா வைத்தியசாலையில் சிகிச்சைக்காக அனுமதிக்கப்பட்டுள்ளார். நாடாளுமன்ற தேர்தலை முன்னிட்டு மாவட்ட செயலகத்தில், தெரிவத்தாட்சி அலுவலகமும் செயற்பட்டு வருகின்றது. 

வேட்பு மனு தாக்கல் செய்யப்பட்ட நாளில் இருந்து மாவட்ட செயலகம் தெரிவத்தாட்சி அலுவலகம் எனும் ரீதியில் பொலிஸ் பாதுகாப்பு வழங்கப்பட்டு பாதுகாப்பு நடவடிக்கைகள் பலப்படுத்தப்பட்டு இருந்தது. இந்நிலையிலையே பலத்த பாதுகாப்புக்கு மத்தியில் உள்ள மாவட்ட செயலக வாயிலுக்கு அருகில் வன்முறை கும்பல் மோட்டர் சைக்கிள் வந்து வாள் வெட்டு தாக்குதலை நடாத்தி விட்டு தப்பி ஓடியுள்ளனர் குறிப்பிடத்தக்கது.
July 09, 2020

நாட்டில்  மேலும் 57  கொரோனா தொற்றாளர் அடையாளம்! 

நாட்டில்  மேலும் 57  கொரோனா தொற்றாளர் அடையாளம்! 


நாட்டில் மேலும் 57 பேருக்கு கொரோனா வைரஸ் தொற்று உறுதிப்படுத்தப்பட்டுள்ளதாக சுகாதார சேவைகள் பணிப்பாளர் நாயகம் அனில் ஜாசிங்க தெரிவித்துள்ளார்.

கந்தக்காடு தனிமைப்படுத்தல் நிலையத்தில் தடுத்துவைக்கப்பட்டிருந்த வெலிக்கட சிறைச்சாலை கைதிகள் மற்றும் ஊழியர்கள் என 450 பேரிடம் மேற்கொள்ளப்பட்ட பி.சி.ஆர். பரிசோதனையின் முடிவில் 56 பேருக்கு கொரோனா தொற்று உறுதி செய்யப்பட்டுள்ளது. 

அத்துடன் மேலும் மாரவில பகுதியைச் சேர்ந்த பெண்ணொருவருக்கும் கொரோனா தொற்று உறுதியாகியுள்ளதாக சுகாதார சேவைகள் பணிப்பாளர் குறிப்பிட்டுள்ளார். கந்தக்காடு புனர்வாழ்வு மத்திய நிலையத்தில் ஆலோசகராகப் பணியாற்றும் பெண் ஒருவருக்கே இவ்வாறு வைரஸ் தொற்றுக்கு கண்டறியப்பட்டுள்ளது. இந்நிலையில் மொத்தம் 57 பேருக்கு கொரோனா தொற்று உறுதியாகியுள்ளமை குறிப்பிடத்தக்கது.
July 09, 2020

இலங்கையில் இந்துக்களுக்கு ஆடி அமாவாசை உற்சவம் தொடர்பில் விடுக்கப்பட்ட முக்கிய அறிவித்தல்!

 இந்துக்களுக்கு எதிர்வரும் ஆடி அமாவாசை உற்சவம் தொடர்பில் விடுக்கப்பட்ட அறிவிப்பு!


நாட்டில் ஆடி அமாவாசையை முன்னிட்டு கடலோரங்களை அண்டிய பகுதிகளில் பிதிர் கடன்களை நிறைவு செய்வதற்கு இலங்கையில் இந்துக்களுக்கு அனுமதி வழங்கப்பட்டுள்ளதாக அறிவிக்கப்பட்டுள்ளது.  

தற்போதைய சூழ்நிலையில் உலகளாவிய ரீதியில் கொரோனா வைரஸ் தொற்று அச்சம் உள்ளதால் இலங்கையிலும் மக்கள் சுகாதார விதிகளை கடைப்பிடித்த வண்ணம் தமது நாளாந்த நடவடிக்கைகளை மேற்கொண்டு வருகின்றனர். 

இந்த நிலையில் ஆடி அமாவாசை உற்சவத்தின் போது  குளங்கள் மற்றும் கடலோரங்களில் பிதிர் கடனை செலுத்துவதற்கு சுகாதார தரப்பினர் அனுமதி மறுத்திருந்தனர். இதனையடுத்து எதிர்வரும் 20ஆம் திகதி ஆடி அமாவாசை தினத்தில் இந்துக்கள் பிதிர் கடனை நிறைவேற்றல் தொடர்பில் சிக்கல் ஏற்பட்டிருந்தது. 

இந்த விடயம் குறித்து அறிந்த அமைச்சர் டக்ளஸ் தேவானந்தா குறித்த விடயத்தை நேற்றைய தினம் அமைச்சரவையில் முன்வைத்திருந்தார். 

அதற்கமைய குளங்கள் குறுகிய பரப்பை கொண்டுள்ளதால் கொரோனா தொற்று பரவும் சாத்தியம் அதிகம் காணப்படுகிறது. எனவே அதற்கு பதிலாக கடலோரங்களில் இந்துக்கள் தமது கருமங்களை நிறைவேற்றிக்கொள்ள முடியும் என அமைச்சரவை அனுமதி வழங்கியுள்ளமை குறிப்பிடத்தக்கது.
July 09, 2020

இலங்கையில் தங்கத்தின் விலை மேலும் உயர்வு!

இலங்கையில் தங்கத்தின் விலை மேலும் உயர்வு!


கொரோனா வைரஸ் பரவலை அடுத்து இலங்கையில் தங்கத்தின் விலை சடுதியாக அதிகரித்துள்ளது. உலக சந்தையில் தங்கத்தின் விலை அதிகரித்துள்ளமையால், இலங்கையிலும் தங்கத்தின் விலை அதிகரித்துள்ளதாக கொழும்பு செட்டியார்தெரு தங்க நகை உரிமையாளர்கள் சங்கம் தெரிவித்துள்ளது. 

இதற்கமைய 24 கரட் தங்கத்தின் இன்றைய விலை ஒரு இலட்சம் ரூபாவாகும். 22 கரட் தங்கத்தின் பெறுமதி 88,000 ரூபாவாக அதிகரித்துள்ளதுடன் , செய்கூலி மற்றும் சேதாரத்துடன் 22 கரட் தங்க நகையின் இன்றைய விலை 97,000 ரூபாவாகும். கொரோனா வைரஸ் பரவலுக்கு முன்னைய காலப்பகுதியில் ஒரு பவுண் தங்கத்தின் விலை 70 ஆயிரமாக காணப்பட்டமை குறிப்பிடத்தக்கது.
July 09, 2020

முல்லைத்தீவு-பரந்தன் பிரதான வீதியில் டிப்பர் வாகனம் மோதி  18 மாடுகள் பரிதாபமாக பலி! 

பரந்தன் பிரதான வீதியில் டிப்பர் வாகனம் மோதி  18 மாடுகள் பரிதாபமாக பலி! 


முல்லைத்தீவு – பரந்தன் ஏ -35 வீதியின் வெலிக்கண்டல் சந்திப் பகுதியில் டிப்பர் வாகனத்தில் மோதுண்டு 18 மாடுகள்  உயிரிழந்துள்ளன. 

குறித்த விபத்து சம்பவம் இன்று அதிகாலை இடம்பெற்றுள்ளது . விசுவமடு பகுதியில் இருந்து வேகமாக வந்த டிப்பர் வாகனம் ஒன்றே இவ்வாறு வீதியில் பயணித்துக் கொண்டிருந்த மாடுகளை மோதித் தள்ளி விட்டு தப்பிச் சென்றுள்ளதாக விபத்தினை அவதானித்தவர்கள் குறிப்பிட்டுள்ளார். 

கிளிநொச்சி இரணைமடு குளத்தின் கீழ் சிறுபோக செய்கை மேற்கொள்ளப்பட்டுள்ளது. இந்த நிலையில், கால்நடை பண்ணையாளர்கள் தமது கால்நடைகளை பயிர்ச்செய்கைக்கு உட்படாத நிலப்பகுதியான வெலிக்கண்டல் பகுதியில் வைத்து  மேய்சலுக்கு விட்டு வருகின்ற நிலையில் இவ்வாறு விபத்து இடம்பெற்றுள்ளமை குறிப்பிடத்தக்கது.
July 09, 2020

நாட்டில் அதிகரித்த மின் கட்டணம் காரணமாக மக்களுக்காக அரசாங்கம் வழங்கும் சலுகை!

நாட்டில் மக்களுக்காக அரசாங்கம் வழங்கும் சலுகை!


நாட்டில் மார்ச் மற்றும் ஏப்ரல் மாதத்தில் அதிகரித்த மின்சாரக் கட்டணப் பட்டியலில் ஒரு பகுதியை ஏற்றுக்கொள்ள அரசாங்கம் முடிவெடுத்துள்ளது. 

 மின்சாரக் கட்டணம் உயர்வடைந்ததன் காரணமாக மின் பாவனையாளர்களுக்கு வழங்கக் கூடிய அதிகபட்ச நிவாரணமாக இந்த தீர்மானம் எடுக்கப்பட்டதாக மின்சக்தி அமைச்சர் மஹிந்த அமரவீர குறிப்பிட்டார். நேற்று கூடிய அமைச்சரவை இதற்கான அனுமதியை வழங்கியுள்ளது. கொரோனா வைரஸ் தொற்று காரணமாக அமுல்படுத்தப்பட்ட ஊரடங்கு உத்தரவால், பொதுமக்கள் இரண்டு மாதங்களுக்கு மேற்பட்ட காலப்பகுதியில் வீட்டிற்குள்ளேயே தங்கியிருந்தனர். 

இதன் காரணமாக வீடுகளின் மின்சாரக் கட்டணப் பட்டியல் அதிகரித்துள்ளதாக அமைச்சர் தெரிவித்தார். வீடுகளுக்குள்ளேயே தங்கியிருக்குமாறு அரசாங்கத்தால் ஆலோசனை வழங்கப்பட்டமையால் அதிகரித்த மின்சாரக் கட்டணத்தின் ஒரு பகுதியை அரசாங்கத்தின் ஊடாக செலுத்துவதற்கு தீர்மானிக்கப்பட்டதாக மின்சக்தி அமைச்சர் குறிப்பிட்டுள்ளார். 

இதற்கமைய அதிகரித்த மின்சாரக் கட்டணத்திற்கு சலுகைகளைப் பெற்றுக்கொடுப்பதற்காக மின்சக்தி அமைச்சரால் நியமிக்கப்பட்ட ஐவர் அடங்கிய குழுவின் அறிக்கை அமைச்சரவையில் இன்று சமர்ப்பிக்கப்பட்டது.

இதன்போது, அமைச்சரவையில் வழங்கப்பட்ட ஆலோசனைக்கு அமைய, அந்தக் குழுவின் பரிந்துரைகளின் ஊடாக பொதுமக்களுக்கு வழங்கப்படும் கூடிய அதிகபட்ச நிவாரணமாக மின்சாரக் கட்டணத்தின் ஒரு பகுதியை அரசாங்கத்தால் செலுத்த தீர்மானிக்கப்பட்டதாக மின்சக்தி அமைச்சர் மஹிந்த அமரவீர தெரிவித்தார்.
July 09, 2020

சங்குப்பிட்டி பாலத்திற்கு  அருகே இடம்பெற்ற  கோர விபத்து! வேட்பாளர்கள் உள்ளிட்ட நால்வர் தீவிர சிகிச்சை பிரிவில் அனுமதி!

சங்குப்பிட்டி பாலத்திற்கு  அருகே இடம்பெற்ற  கோர விபத்து!


விபத்தின் மையமாக மாறிவரும் சங்குபிட்டி பாலத்தை அண்டிய  பகுதியில் நேற்று இடம்பெற்ற விபத்தில் வேட்ப்பாளர்கள் இருவர் உட்பட நால்வர் படுகாயம் அடைந்துள்ளதாக தெரிவிக்கப்படுகின்றது. நேற்று மாலை 6.35 மனியவில் இடம்பெற்ற வாகன விபத்திலையே நால்வர் படுகாயம் அடைந்து யாழ். போதனா வைத்தியசாலை அவசர சிகிச்சை பிரிவில் அனுமதிக்கப்பட்டு சிகிச்சை பெற்று வருகின்றனர். 

குறித்த விபத்து தொடர்பில் மேலும் தெரிய வருவதாவது, பூநகரி பகுதியில் இருந்து யாழ் நோக்கி பயணித்துக்கொண்டிருந்த முச்சக்கர வண்டியும், யாழில் இருந்து பூநகரி நோக்கி பயணித்துக் கொண்டிருந்த டிப்பர் வாகனமும் சங்குப்பிட்டி பாலத்திற்கு அருகாமையில் விபத்துக்குள்ளானது. 

இவ் விபத்தில் முச்சக்கர வண்டியில் பயணித்துக் கொண்டிருந்த யாழ். தேர்தல் தொகுதியில் சுயேட்சை குழுவில் போட்டியிடும் கிளிநொச்சியை சேர்ந்த இரண்டு வேட்ப்பாளர்களும், முச்சக்கர வண்டி மற்றும் டிப்பர் வாகன சாரதியும் காயங்களுக்கு உள்ளாகினர். காயமடைந்தவர்கள் உடனடியாக சாவகச்சேரி ஆதார வைத்தியசாலையில் அனுமதிக்கப்பட்டு, மேலதிக சிகிச்சைக்காக யாழ். போதனா வைத்திய சாலைக்கு கொண்டுசெல்லப்பட்டனர். 

அத்துடன் இவர்கள் அனைவரும் அவசர சிகிச்சை பிரிவில் அனுமதிக்கப்பட்டு சிகிச்சை பெற்று வருவதாக தெரிவிக்கப்பட்டுள்ளது. விபத்துக்குள்ளான இரண்டு வாகனங்களும் தடம்புரண்டமையால் சிறிது நேரம் சங்குப்பிட்டி ஊடான போக்குவரத்து தடைப்பட்டு இருந்தது. குறித்த விபத்து தொடர்பான விசாரணைகளை பூநகரி பொலிஸ் போக்குவரத்துப் பிரிவு மேற்கொண்டு வருகின்றது.
July 09, 2020

யாழில் கோவில் ஒன்றில் உண்டியலை உடைத்து பணத்தை திருடிய பூசகர் !நேரில் கண்ட மக்கள் சாட்சி! 

யாழில் கோவில் ஒன்றில் உண்டியலை உடைத்து பணத்தை திருடிய பூசகர் !


யாழ்ப்பாணத்தில் புன்னாலைக்கட்டுவன் ஆயாக்கடவை சித்தி விநாயகர் ஆலய திருப்பணி உண்டியல் ஆலய பூசகரால் உடைக்கப்பட்டுள்ளதாக தெரிவிக்கப்பட்டுள்ளது.இந்த சம்பவம் நேற்று இடம்பெற்றுள்ளதாக தெரிவிக்கப்படுகின்றது. இந்நிலையில், இது குறித்து பொலிஸாருக்கு தகவல் வழங்கப்பட்டுள்ளது. 

புன்னாலைக்கட்டுவன் ஆலய உரிமம் சம்மந்தமான வழக்கில் ஆலய பூசகருக்கு சாதகமாக வழக்கு தீர்ந்ததும் அது சம்மந்தமான மேன் முறையீடு யாழ். மேல் நீதிமன்றில் இடம்பெற்று வருகின்றது. 

இது இவ்வாறு இருக்க ஆலய பூசகரால் திருப்பணி உண்டியல் நள்ளிரவில் உடைக்கப்பட்டுள்ளது. ஆலயத்தின் திறப்பு பரிபாலன சபையிடம் உள்ள நிலையில் அதனை வழக்கறிஞர் மூலமோ அன்றி நீதிமன்றம் ஊடாகவோ திறப்பை பெற்றுக்கொள்ளாமல், இரவில் உண்டியலை உடைத்த செயல் ஊர் மக்களிடையேயே விசனத்தை உருவாக்கியுள்ளது. 

 அது மட்டும் அன்றி இரவில் ஊராரின் பிரசன்னம் இல்லா நேரத்தில் இவ்வாறு செய்ய வேண்டிய தேவை என்ன என்றும் உண்மையான உள்நோக்கம் என்ன என்று ஊரார் கேள்வி எழுப்புகின்றனர். முன்னர் விபத்தில் தானாகவே சிக்கி கொண்டு தன்னை கொலை செய்ய வந்ததாக கூறிய இந்த பூசகர், தானே உண்டியலை உடைத்து விட்டு ஊர் மக்களின் தலையில் அதனை போடும் முற்சியில் ஈடுபட்டிருக்கலாம் என்று ஊர் மக்கள் தெரிவித்தனர். எனினும், உண்டியல் உடைக்கப்பட்டமையை அந்த பகுதி மக்கள் நேரில் கண்டுள்ளனர். 

இதனால் இந்த பிரச்சினை மக்கள் மீது சுமத்தப்படவில்லை எனவும் அந்த பகுதி பொது மக்கள் கூறியுள்ளனர். அது மட்டுமன்றி இந்த பூசகரது இந்த அடாவடி தனமான நடவடிக்கைகளுக்கு ஆதரவு வழங்கும் குருமார் ஒன்றியம் மீது மக்கள் விசனம் தெரிவித்தனர்.
July 09, 2020

கனவில் தந்தை சொன்ன தகவலால் வீட்டு வளவை தோண்டிய மகள்கள்!

கனவில் தந்தை சொன்ன தகவலால் வீட்டு வளவை தோண்டிய மகள்கள்!


வேயங்கொட பகுதியில் புதையல் தோண்டுதலில்  ஈடுபட்ட பெண்கள் இருவர் பொலிஸாரால் கைதாகியுள்ளனர். 

மீரிகம பிரதேசத்தில் வசிக்கும்  இரு சகோதரிகளின் பிறந்த வீடு பல்லேவெல போருக்கமுவ பிரதேசத்தில் உள்ளது. அந்த வீட்டிற்கு பின்னால் புதையல் உள்ளதாகவும், உயிரிழந்த தந்தை கனவில் வந்து அதனை சொன்னதாகவும் கைது செய்யப்பட்ட பெண்கள் பொலிஸாரிடம் குறிப்பிட்டுள்ளனர். 

கனவில் தந்தை சொன்ன தகவலுக்கு அமைய இருவரின் உதவியுடன் புதையல் தோண்டும் நடவடிக்கையில் ஈடுபட்டதாக தெரிவித்துள்ளனர். இதனை அடுத்து வேயங்கொடை பொலிஸ் பரிசோதகருக்கு கிடைத்த தகவலுக்கமைய குறித்த இரு பெண்களும் கைது செய்யபட்டுள்ளனர். மற்றைய இருவரும் தப்பி ஓடியுள்ளதாக தெரிவிக்கப்படுகின்றது.
July 09, 2020

நல்லூர் கோயில் சிங்கள இளவரசர் கட்டியதற்கான ஆதாரம் இருப்பதாக கூறப்படும் புதிய தகவல்!

நல்லூர் கோயில் சிங்கள இளவரசரால் கட்டப்பட்டதாக கூறப்படும் புதிய தகவல்!


யாழில் அமைந்துள்ள நல்லூர் கந்தசுவாமி கோயில் சிங்கள இளவரசரான சபுமல் குமார என்பவராலேயே கட்டப்பட்டதாக தொல்பொருள் மரபுரிமைகளைப் பாதுகாக்கும் ஜனாதிபதி செயலணியின் உறுப்பினர் எல்லாவெல மேதானந்த தேரர் கூறியுள்ளார்.

மேலும் அநுராதபுர காலத்தில் கட்டப்பட்ட கோகண்ண விகாரை மீதே திருகோணமலை, திருக்கோணேச்சர ஆலயம் கட்டப்பட்டுள்ளது என்று தெரிவித்திருந்த அவர், இவற்றுக்கான ஆதாரம் தம்மிடம் உள்ளதாக தெரிவித்துள்ளார். என்றபோதும் தாம் வரலாற்றுப் புகழ்மிக்க தமிழர்களின் ஆலயங்களை உரிமை கோரமாட்டோம் என்று அவர் குறிப்பிட்டுள்ளார். 

கிழக்கு மாகாணத்தில் உள்ள தொல்பொருள் மரபுரிமைகள் தொடர்பாக ஆராய்வதற்கு ஜனாதிபதியால் நியமிக்கப்பட்ட விசேட செயலணி குறித்து தமிழ், முஸ்லிம் மக்கள் அச்சம் கொள்ளத் தேவையில்லை எனவும் செயலணியின் நோக்கம் மக்கள் மத்தியில் முரண்பாடுகளை தோற்றுவிப்பது அல்லவென்றும் அவர் குறிப்பிட்டுள்ளார். 

அத்துடன், சிதைவடைந்துள்ள தொல்பொருள் மரபுரிமையினை அடையாளப்படுத்தி அதனை பாதுகாப்பதே தமது பிரதான நோக்கம் என்றும் பௌத்த மத மரபுரிமைகளை மட்டுமன்றி பிற இனங்களின் மதம் தொடர்பான உரிமைகளும் செயலணியின் ஊடாக பாதுகாக்கப்படும் எனவும் அவர் கூறியுள்ளார். 

 இதனிடையே, ஆய்வு நடவடிக்கைகளின்போது கிடைக்கப்பெறும் தரவுகளைக் கொண்டு அறிவிக்கப்படும் செய்திகள் ஏற்றுக்கொள்ளப்பட வேண்டும் என தெரிவித்துள்ள மேதானந்த தேரர், வரலாற்றுச் சிறப்புமிக்க திருகோணமலையில் அமைந்துள்ள திருகோணேச்சரம் கோகண்ண விகாரையின் மீது நிர்மாணிக்கப்பட்டுள்ளமைக்கான தொல்பொருள் சான்றாதாரங்கள் தற்போது கிடைக்கப் பெற்றுள்ளதாக குறிப்பிட்டுள்ளார். 

போர்த்துக்கேயரின் படையெடுப்பினால் அந்த விகாரை அழிக்கப்பட்டது என்றும் பிற்பட்ட காலத்தில் அவ்விடத்தில் திருகோணேச்சரம் ஆலயம் கட்டப்பட்டதாகவும் அவர் தெரிவித்துள்ளதுடன் தற்போது இதற்கு எதிர்ப்பு தெரிவிக்கவில்லை என்றும் உண்மையை அறிந்துகொள்வது அவசியம் எனவும் தெரிவித்துள்ளார். 

இதை அடுத்து , கோட்டை இராசதானி காலத்தில் யாழ்ப்பாணம் நல்லூர் கந்தசுவாமி கோயில் சிங்கள இளவரசரான சபுமல் குமார என்பவரால் கட்டப்பட்டது என்பதையும் அனைவரும் ஏற்றுக்கொள்ள வேண்டும் என அவர் தெரிவித்துள்ளார் இதற்காக தாங்கள் நல்லூர் ஆலயத்தை உரிமை கோரவில்லை எனவும் இந்து மதத்திற்கும், பௌத்த மதத்திற்கும் இடையில் நெருங்கிய தொடர்பு உண்டு என்பது இரு தரப்பு மத வழிபாடுகள் மற்றும் கட்டடக்கலை ஊடாக உறுதியாகின்றன என்றும் எல்லாவெல மேதானந்த தேரர் தெரிவித்துள்ளார்.