யாழில் பரபரப்பை ஏற்படுத்தி வரும் கொள்ளை கும்பல்..!

யாழில் பரபரப்பை ஏற்படுத்தி வரும் கொள்ளை கும்பல்..!

யாழ்ப்பாணக்  அண்மைக்காலமாக தொடர்ச்சியாக நடைபெற்று வரும் இரவுவேளைகளில் வாள்களைக் காண்பித்து கொள்ளையில் ஈடுபடும் சம்பங்களுடன் தொடர்புடைய இருவர் கைது செய்யப்பட்டுள்ளனர்.

அத்துடன் மேலும் இருவர் தப்பி ஓடித் தலைமறைவாகியுள்ளனர் என்று பொலிஸார் குறிப்பிட்டுள்ளனர்.

யாழ் .மானிப்பாய் கட்டுடை பகுதியில் உள்ள பற்றைக் காணிக்குள் கூடாரம் அமைத்து யாருக்கும் தெரியாமல் மறைந்து வாழ்ந்து வந்தநிலையில் இருவர் கைது செய்யப்பட்டனர் என்று பொலிஸார் தெரிவித்துள்ளனர்.

இதுதொடர்பில் பொலிஸார் தெரிவித்துள்ளதாவது,

“மானிப்பாய் பொலிஸ் பிரிவில் 5 கொள்ளைச் சம்பவங்கள், பளை, தெல்லிப்பழை, இளவாலை பொலிஸ் பிரிவுகளில் வீடுகளுக்குள் நுழைந்து வாள்களைக் காட்டி கொள்ளையில் ஈடுபட்டமை தொடர்பில் சந்தேக நபர்கள் பொலிஸாரால் தேடப்பட்டு வந்தனர்.

இந்தக் கொள்ளைக் கும்பலைச் சேர்ந்த இருவருக்கு சாவகச்சேரி மற்றும் கிளிநொச்சி நீதிமன்றங்களில் கொள்ளைக் குற்றச்சாட்டு வழக்குகளும் நிலுவையில் உள்ளன என்று தெரிய வந்துள்ளது.

இந்நிலையில் மானிப்பாய் பொலிஸ் பிரிவுக்குட்பட்ட கட்டுடையில் பற்றைக் காணிக்குள் தற்காலிக கூடாரம் அமைத்து மறைந்திருந்த போது கொள்ளைக் கும்பலைச் சேர்ந்த இருவர் கைது செய்யப்பட்டனர். கட்டுடை மற்றும் நவாலிப் பகுதிகளைச் சேர்ந்த 22 மற்றும் 26 வயதுடையவர்களே இவ்வாறு கைது செய்யப்பட்டனர். அவர்களிடம் வாள் ஒன்றும் 4 பவுண் தங்க நகையும் பொலிஸாரால் கைப்பற்றப்பட்டுள்ளது.

இந்த கொள்ளை கும்பலைச் சேர்ந்த மேலும் இருவர் தப்பி ஓடித் தலைமறைவாகியுள்ளனர். அவர்களிடம் 2 வாள்கள் மற்றும் 15 பவுண் நகைகள் உள்ளன என்று கைது செய்யப்பட்டவர்கள் தெரிவித்துள்ளனர்.

இந்தக் கொள்ளைக் கும்பல் இரவு வேளைகளில் வீடுகளுக்குள் புகுந்து வாள்களைக் காண்பித்து மிரட்டி கொள்ளையில் ஈடுபட்டு வந்துள்ளது. அவர்கள் ஒரு இடத்தில் கொள்ளையில் ஈடுபட்டால் வேறு ஓர் பிரதேசத்துக்குச் சென்று வாடகைக்கு வீடு எடுத்து தலைமறைவாகி வாழ்வதாக வாக்குமூலம் வழங்கியுள்ளனர்.மேலும்  இது தொடர்பில் கைதான சந்தேக நபர்கள் இருவரிடமும் மேலதிக விசாரணைகளை நடத்தி வருவதாக பொலிசார் குறிப்பிட்டுள்ளனர்.